tpcc new chief: పీసీసీ చీఫ్ అతనికిస్తే ఊరుకోను, బిడ్డను రంగలోకి దింపుతా.. జగ్గారెడ్డి సంచలన వ్యాఖ్యలు – mla jagga reddy makes key comments over tppc chief post changing


తెలంగాణ కాంగ్రెస్‌లో పీసీసీ అధ్యక్షుడి మార్పు గురించి చాలా రోజులుగా చర్చలు జరుగుతున్న సంగతి తెలిసిందే. ఈ క్రమంలో సంగారెడ్డి ఎమ్మెల్యే జగ్గారెడ్డి పీసీసీ చీఫ్ మార్పు వ్యవహారంపై కీలకమైన వ్యాఖ్యలు చేశారు. ప్రస్తుతం పీసీసీ అధ్యక్షుడిగా ఉన్న ఉత్తమ్ కుమార్‌ రెడ్డిని మార్చాల్సిన అవసరం ఏముందని ఆయన ప్రశ్నించడం ప్రాధాన్యం సంతరించుకుంది. లాక్‌ డౌన్ ముగింపుతో కాంగ్రెస్ పార్టీలో మళ్లీ రాజకీయాలు మొదలయ్యాయని, పీసీసీ మార్పుపైనా ప్రయత్నాలు జరుగుతున్నాయని జగ్గారెడ్డి అన్నారు. ఈ విషయంపై తాను రాహుల్ గాంధీకి లేఖ రాస్తానని, వచ్చే ఎన్నికలను కూడా ఉత్తమ్ చేతుల మీదుగా నడిస్తేనే మంచిదని ఆయన అభిప్రాయపడ్డారు. ఆదివారం ఆయన విలేకరులతో మాట్లాడారు.

తెలంగాణ కాంగ్రెస్ పార్టీలో పీసీసీ పదవి కోసం 20 మంది నేనంటే నేనని పోటీపడుతున్నారని జగ్గారెడ్డి తెలిపారు. రేవంత్ రెడ్డి సైతం పీసీసీ అడుగుతున్నారని, ఎవరి అభిప్రాయాలు తీసుకోకుండా కనుక అతనికి పదవి ఇస్తే కచ్చితంగా వ్యతిరేకిస్తామని తేల్చి చెప్పారు. రేవంత్‌కు పీసీసీ ఇవ్వకూడదని అన్నారు. ఒకవేళ తనను అడగకుండా రేవంత్‌కి పీసీసీ ఇస్తే తన రాజకీయ ప్రణాళిక తనకు ఉందని జగ్గారెడ్డి అన్నారు. కొత్త వ్యూహంతో ముందుకెళ్తానని చెప్పారు.

ఉత్తమ్ కుమార్ రెడ్డి తన భార్యను గెలిపించుకోలేకపోవడం వల్ల పీసీసీకి సరికాదు అనేది రేవంత్ రెడ్డి వర్గం చేసిన ప్రచారమని విమర్శించారు. ఉత్తమ్ పీసీసీగా ఫెయిల్ అయ్యారనేది అనవసర నింద అని అన్నారు. పీసీసీ పదవి రేవంత్ రెడ్డి తప్ప ఎవరికీ ఇచ్చినా అభ్యంతరమేం లేదని స్పష్టం చేశారు. తాను కూడా పీసీసీ రేసులో ఉన్నట్లు పేర్కొన్నారు.

కాంగ్రెస్‌లో చాలామంది ప్రభుత్వ కోవర్డులు ఉన్నారని జగ్గారెడ్డి మరోసారి విమర్శించారు. పార్టీ ఇన్‌ఛార్జి కుంతియా చూట్టూ ఎంతో మంది తిరుగుతున్నారని తెలిపారు. తన కూతురు జయారెడ్డికి రాజకీయాలపై ఆసక్తి లేదని, కానీ పరిస్థితులను బట్టి జయారెడ్డిని రాజకీయాల్లోకి తీసుకువస్తున్నట్లు పేర్కొన్నారు. ఒకవేళ ఎవరైనా రాజకీయ కక్షసాధింపునకు దిగితే.. తన కూతురు రాజకీయాల్లో ఉంటుంది కాబట్టి తనకంటే గట్టిగా కొట్లాడి సాధించుకుంటుందని జగ్గారెడ్డి వ్యాఖ్యానించారు.



Source link

Leave a Reply

Your email address will not be published. Required fields are marked *