Trump coronavirus test : రెండోసారి ట్రంప్‌కి కరోనా పరీక్షలు.. పావు గంటలో రిజల్ట్ – us president donald trump coronavirus tests negative second time


అమెరికాలో కరోనా వైరస్ స్వైర విహారం కొనసాగుతోంది. ప్రపంచంలోనే అత్యధికంగా 2.45 లక్షల మంది కరోనా వైరస్ బారినపడ్డారు. వీరిలో 6,000 మంది మృత్యువాతపడ్డారు. ఈ నేపథ్యంలో అమెరికా అధ్యక్షుడు డొనాల్డ్‌ ట్రంప్‌నకు రెండోసారి కరోనా పరీక్షలు నిర్వహించారు. గురువారం నిర్వహించిన పరీక్షల్లో నెగిటివ్‌‌గా వచ్చినట్టు ట్రంప్‌ వ్యక్తిగత వైద్యుడు సీన్‌ పి కాన్‌లీ వెల్లడించారు. కేవలం 15 నిమిషాల్లోనే రిపోర్టు వచ్చిందని, అధ్యక్షుడికి కరోనాకు సంబంధించి ఎలాంటి లక్షణాలు లేవని ఆయన స్పష్టం చేశారు. ట్రంప్ సైతం ఈ విషయం స్వయంగా ప్రకటించారు. మీడియా సమావేశంలో ట్రంప్‌ మాట్లాడుతూ.. తనకు నిర్వహించిన పరీక్ష ఫలితాలు చాలా త్వరగా, కచ్చితంగా వచ్చాయని తెలిపారు.


ఇదిలా ఉండగా, అమెరికాలో కరోనా వైరస్‌ తీవ్రరూపం దాల్చడంతో మరో నాలుగు వారాల పాటు ఆంక్షల్ని పొడిగిస్తున్నట్లు ట్రంప్ వెల్లడించారు. కరోనాపై విజయం సాధించాలంటే ప్రజలందరూ ఇళ్లకు పరిమితమై, సామాజిక దూరం పాటించాలని ట్రంప్‌ స్పష్టం చేశారు. ప్రతీ ఒక్కరూ ప్రభుత్వ హెచ్చరికలను తూ.చ. తప్పకుండా పాటించడం ఎంతో ముఖ్యమని, తద్వారా దేశంలో ఎంతో మంది ప్రాణాలను కాపాడినవారమవుతామని పేర్కొన్నారు.

సామాజిక దూరం, వ్యక్తిగత శుభ్రత పాటించి, అందరూ ఇళ్లకే పరిమితం కావడం వల్ల ఈ ప్రమాదం నుంచి బయటపడతామని ఆయన ఆశాభావం వ్యక్తంచేశారు. ప్రపంచంలోనే అత్యుత్తమ వైద్యులు, శాస్త్రవేత్తలు, పరిశోధకులతో కలిసి అమెరికా పనిచేస్తోందన్నారు. కరోనాపై విజయం సాధించేందుకు కొత్త పద్ధతులను అవలంభిస్తున్నామని, బాధితులకు చికిత్స, వైద్యం, వ్యాక్సిన్‌ తయారీలో మెరుగైన ఫలితాలు సాధిస్తున్నామని ట్రంప్‌ వెల్లడించారు. రోజుకు లక్ష మందికి నిర్వహిస్తున్న కరోనా పరీక్షలతో కచ్చితమైన ఫలితాలు వస్తున్నాయని తెలిపారు.

మార్చిలోనూ ట్రంప్‌నకు కరోనా నిర్ధారణ పరీక్షలు నిర్వహించిన విషయం తెలిసిందే. బ్రెజిల్ అధ్యక్షుడు బోల్సోనారో సహా ఆయన కమ్యూనికేషన్‌ చీఫ్‌ ఫాబియోతో భేటీ అయ్యారు. అయితే, ఈ భేటీ జరిగిన రెండు రోజుల తర్వాత ఫాబియోకు కరోనా వైరస్‌ సోకినట్లు తేలింది. దీంతో డొనాల్డ్ ట్రంప్‌నకు కూడా కోవిడ్ సోకిందేమోనని అనుమానాలు వ్యక్తమయ్యాయి. దీంతో అమెరికా అధ్యక్షుడికి కరోనా పరీక్షలు నిర్వహించారు. అప్పుడు కూడా నెగెటివ్‌గా వచ్చింది.





Source link

Leave a Reply

Your email address will not be published. Required fields are marked *