up man memory loss: పెళ్లి విడదీసింది.. కరోనా కలిపింది! ఇది కథ కాదు, మహమ్మారి చేసిన మేలు.. – up man with memory loss held on mysuru road during lockdown recalls his past, reunite with family after 3 years


రోనా మహమ్మారి చాలా మంది జీవితాలను తలకిందులు చేసింది. కొంత మంది జీవితాల్లో తీరని విషాదాన్ని నింపింది. ఇదే సమయంలో కొంత మందికి మేలు కూడా చేస్తోంది. అలాంటిదే ఈ అద్భుతం.. తాను చేసిన చిన్న పొరపాటు వల్ల మూడేళ్ల కిందట తప్పిపోయి తీవ్ర ఇబ్బందులు పడ్డ ఓ వ్యక్తిని తన కుటుంబం చెంతకు చేరేలా చేసింది కరోనా లాక్‌డౌన్. ఆ వివరాలు..

మూడేళ్ల కిందటి మాట.. ఉత్తర ప్రదేశ్‌కు చెందిన కరమ్‌ సింగ్‌ (70) తన కుమారుడి పెళ్లిని తోచినంతలో ఏ లోటూ రాకుండా చేయాలని కలలు కన్నాడు. అందుకు అవసరమైన డబ్బు సమకూర్చడం కోసం ఇంటి నుంచి బయల్దేరాడు. అంతే.. ఇక తిరిగిరాలేదు. రైల్వే స్టేషన్‌లో అతడు చేసిన చిన్న పొరపాటే అందుక్కారణం. తాను ఎక్కాల్సిన రైలుకు బదులు మరో రైల్లో ఎక్కాడు. అలా బెంగళూరుకు చేరుకున్నాడు.

తనకు ఏమాత్రం తెలియని ప్రాంతం, కొత్త భాష.. ఏం చేయాలో తెలియని పరిస్థితుల్లో కరమ్ సింగ్ తీవ్ర ఇబ్బందులు పడ్డాడు. ఎటు వెళ్లాలో తెలియక రోడ్ల వెంట నడుస్తూనే ఉన్నాడు. అలా మైసూరులో తేలాడు. ఈ కఠినమైన ప్రయాణం, ఆందోళన వల్ల అతడు మతిస్థిమితం కోల్పోయాడు. తను ఎవరు, ఎక్కడి నుంచి వచ్చాడు తదితర వివారాలు అతడికి గుర్తు లేవు. అలా మైసూర్‌ నగరంలో మూడేళ్లుగా వీధుల వెంట తిరుగుతూ.. ఎవరైనా కనికరించి ఏదైనా ఇస్తే తింటూ, ఫుట్‌పాత్‌ పడుకుంటూ జీవితం గడిపాడు.

ఇంతో చైనాలో పుట్టిన కరోనా మహమ్మారి భారత్‌లోనూ పంజా విసిరింది. వైరస్ నియంత్రణ కోసం దేశవ్యాప్తంగా లాక్‌డౌన్‌ విధిస్తున్నట్లు ప్రధాని మోదీ ప్రకటించారు. ఈ క్రమంలో కర్ణాటక ప్రభుత్వం వీధుల వెంట ఉండే వారిని, యాచకులను గుర్తించి పునరావాస కేంద్రాలకు పంపించింది. ఈ క్రమంలోనే కరమ్‌ సింగ్‌‌ను కూడా ఓ వృద్ధాశ్రమానికి తీసకెళ్లారు మైసూర్ కార్పొరేషన్ అధికారులు. ఆశ్రమంలోని మానసిక వైద్యులు అతడికి చికిత్స అందించారు. దీంతో అద్భుతం జరిగింది.

మన తెలుగు సినిమాల్లో తరచూ చూసే ట్విస్టుల మాదిరిగా వైద్యుల చికిత్సతో కరమ్ సింగ్ వెంటనే కోలుకున్నాడు. అతడి జ్ఞాపకశక్తి మెరుగై గతం గుర్తొచ్చింది. తాను ఎవరు? ఎక్కడ నుంచి వచ్చాను? తదితర వివరాలన్నింటినీ వైద్యులతో చెప్పాడు. ఆ వివరాలు నమోదు చేసుకున్న అధికారులు వెంటనే ఉత్తర ప్రదేశ్‌‌లోని అతడి కుటుంబ సభ్యులకు సమాచారం ఇచ్చారు.

కరమ్ సింగ్ కనిపించకుండా పోవడంతో కుటుంబసభ్యులు చాలా కాలం పాటు అతడి కోసం తీవ్రంగా గాలించారు. ఎక్కడా ఆచూకీ దొరక్కపోవడంతో ఆశలు వదిలేసుకున్నారు. అతడు మరణించి ఉంటాడని భావించారు. మైసూర్ పోలీసుల నుంచి ఫోన్ రాగానే.. కరమ్ సింగ్ కుమారుడి ఆనందానికి అవధులు లేకుండా పోయాయి. తన తండ్రిని ఎలాగైనా ఇంటికి పంపించాల్సిందిగా కర్ణాటక అధికారులను కోరాడు.

కరమ్ సింగ్‌ను స్వస్థలానికి పంపించడానికి ఓ స్వచ్ఛంద సంస్థ ఏర్పాటు చేసింది. అతడు బతికే ఉన్నాడనే వార్త తెలియగానే ఆ కుటుంబం ఎంతో సంతోషించింది. అతడి రాక కోసం వేయి కన్నులతో ఎదురు చూస్తోంది. మూడేళ్ల కింద తప్పిపోయి ఇక తిరిగిరాడనుకున్న వ్యక్తి కరోనా లాక్‌డౌన్ కారణంగా ఇప్పుడు సొంత గూటికి చేరబోతున్నాడు.. డెస్టినీ!!

Must Read:నేపాల్‌కు భారత్ వార్నింగ్.. మధ్యలో చైనా, ఏమిటీ వివాదం?

Also Read:రేప్ బాధితురాలి 24 వారాల గర్భం తొలగింపునకు హైకోర్టు అనుమతి



Source link

Leave a Reply

Your email address will not be published. Required fields are marked *