US-China war: మరో ప్రచ్ఛన్న యుద్ధం అంచున అమెరికా-చైనా.. డ్రాగన్ మంత్రి సంచలన వ్యాాఖ్యలు – us, china nearing brink of new cold war says chinese foreign minister


కరోనా వైరస్ కారణంగా అమెరికా, చైనాల మధ్య సంబంధాలు మరింత క్షీణిస్తున్నాయి. ఈ నేపథ్యంలో అమెరికాతో సంబంధాలపై చైనా ఆసక్తికర వ్యాఖ్యలు చేసింది. కరోనా వైరస్, హాంకాంగ్ చట్టం ఇతర సమస్యలతో ఉద్రిక్తతలు పెరిగి అమెరికాతో సంబంధాలు కొత్త ప్రచ్ఛన్న యుద్ధం అంచుకు దారితీన్నాయని చైనా విదేశాంగ మంత్రి వాంగ్ యీ వ్యాఖ్యానించారు. అమెరికాలోని కొన్ని రాజకీయ శక్తులు చైనా-యుఎస్ సంబంధాలను బందీగా చేసుకుని, రెండు దేశాలను కొత్త ప్రచ్ఛన్న యుద్ధం అంచుకు నెట్టివేస్తున్న విషయం తమ దృష్టికి వచ్చిందని పేర్కొన్నారు.

వాణిజ్యం, మానవ హక్కులు, ఇతర సమస్యలపై రెండు దేశాల మధ్య కొనసాగుతున్న దీర్ఘకాలిక ఘర్షణకు కోవిడ్ -19 వ్యాప్తి ఆజ్యం పోసింది. చైనా-అమెరికా సంబంధాలకు రాజకీయ శక్తులు అడ్డుపడుతున్నాయని వాంగ్ యీ వ్యాఖ్యానించినా.. అది ఎవరనేది మాత్రం స్పష్టం చేయలేదు. కానీ, అమెరికా అధ్యక్షుడు డొనాల్డ్ ట్రంప్ కరోనా వైరస్ విషయంలో చైనాను టార్గెట్ చేస్తూ విమర్శలు గుప్పిస్తూ.. పదే పదే ఆరోపణలు చేస్తున్నారు. దీంతో పరోక్షంగా ట్రంప్‌ను ఉద్దేశించి చైనా విదేశాంగ మంత్రి వ్యాఖ్యలు చేశారు.

కాగా, హాంకాంగ్‌పై కఠినమైన ఆంక్షలు విధించే వివాదాస్పద భద్రతా చట్టాన్ని పార్లమెంట్‌లో చైనా శుక్రవారం ప్రవేశపెట్టడంతో అమెరికా సహా పలు దేశాలు దీనిని తీవ్రంగా ఖండిస్తున్నాయి. దీంతో, అమెరికా, చైనాల మధ్య మరింత ఉద్రిక్తత చోటుచేసుకుంది. కరోనా వైరస్ విషయంలో తమకు మరకలంటించి, దోషిగా చూపే ప్రయత్నంలో అమెరికా అదేపనిగా విమర్శలు గుప్పిస్తూ, రెచ్చగొట్టే చర్యలకు పాల్పడుతోందని వాంగ్ యీ మండిపడ్డారు.

కరోనా వైరస్ కారణంగా ఏర్పడిన వినాశనం పక్కనబెడితే.. అమెరికాలో రాజకీయ వైరస్ కూడా వ్యాపిస్తోందని ఆయన దుయ్యబట్టారు. పార్లమెంట్ వార్షిక సమావేశాల సందర్భంగా ఆయన మీడియాతో మాట్లాడుతూ ఈ వ్యాఖ్యలు చేశారు. ఈ రాజకీయ వైరస్ చైనాపై దాడి చేయడానికి, బురద జల్లడానికి ప్రతి అవకాశాన్ని ఉపయోగించుకుంటోందని, కొంతమంది రాజకీయ నాయకులు ప్రాథమిక అంశాలను పూర్తిగా విస్మరిస్తున్నారని విమర్శించారు. చైనాను లక్ష్యంగా చేసుకుని అనేక కుట్రలకు తెరతీశారని అన్నారు.



Source link

Leave a Reply

Your email address will not be published. Required fields are marked *