US plane crash: అమెరికాలో కూలిన విమానం.. ఇద్దరు చిన్నారుల సహా ఐదుగురు దుర్మరణం – five killed in small plane crash in georgia in us


అమెరికాలో శనివారం తెల్లవారుజామున ఘోర విమాన ప్రమాదం సంభవించింది. జార్జియాలో విమానం కూలి ఐదుగురు దుర్మరణం చెందారు. బంధువు అత్యక్రియలకు వెళ్తుండగా.. ఈ ప్రమాదం చోటుచేసుకుంది. వీరిలో నలుగురు ఒకే కుటుంబానికి చెందినవారిగా అధికారులు గుర్తించారు. వీరిలో ఇద్దరు చిన్నారులు కూడా ఉన్నట్టు తెలిపారు. ఫ్లోరిడా నుంచి ఇండియానాకు బంధువు అంత్యక్రియల్లో పాల్గొనడానికి వెళ్తుండగా ఘటన చోటుచేసుకుందని అధికారులు వివరించారు. దక్షిణ అట్లాంటాకు 100 మైళ్ల దూరంలో (161 కిలోమీటర్ల) ఈ విమానం కూలిపోయింది.

ప్రమాదంలో మృతిచెందినవారిని ఫ్లోరిడాలోని మోరిస్టన్‌కు చెందిన ల్యారీ రే ప్రుయిట్టీ (67), షాన్ చార్లెస్ లమంట్ (41), ఆయన భార్య జోడే రే లమంట్ (43), ఇద్దరు చిన్నారులు జయసీ, అలీసీ‌గా గుర్తించారు. ప్రమాదానికి గురైన పైపర్ పీఏ31-టీ విమానం ఫ్లోరిడాలో విల్‌‌స్టన్ నుంచి ఇండియానాలోని న్యూక్యాస్టిల్‌కు వెళ్తోందని తెలిపారు. గాల్లో ఉండగానే విమానంలో మంటలు అంటుకున్నాయని, తర్వాత భారీ శబ్దంతో కూలిపోయిందని స్థానికులు తెలియజేశారు.

ప్రమాదం గురించి సమాచారం అందుకున్న పోలీసులు ఘటనా స్థలికి చేరుకుని సహాయక చర్యలు చేపట్టారు. మృతదేహాలను వెలికితీసి, పోస్ట్‌మార్టం కోసం తరలించారు. కేసు నమోదుచేసిన అధికారులు దర్యాప్తు చేపట్టారు. ప్రమాదానికి గల కారణాలపై ఆరా తీస్తున్నారు. సాంకేతిక లోపం వల్లే ప్రమాదం జరిగిందని భావిస్తున్నారు.



Source link

Leave a Reply

Your email address will not be published. Required fields are marked *