vijayawada coronavirus: ఇక్కడ అష్టాచెమ్మా.. అక్కడ పేకాట, హౌసీ; కాలక్షేపంతో కరోనా బీభత్సం – lorry driver plays cards with friends leads to 24 getting coronavirus in vijayawada


రోనా కట్టడి కోసం లాక్‌డౌన్ విధించి ఎవరి ఇళ్లలో వారిని ఉండాలని ఆదేశిస్తే.. కాలక్షేపం పేరుతో కొంత మంది ఒక చోట చేరుతూ ప్రాణాల మీదకు తెచ్చుకుంటున్నారు. సూర్యాపేటలో ఓ మహిళ కాలక్షేపం కోసం ఆడిన అష్టాచెమ్మ ఆట 31 మందికి కరోనా సోకడానికి కారణం కాగా.. ఇదే తరహాలో విజయవాడ నగరంలో ఇద్దరు లారీ డ్రైవర్లు కరోనా బీభత్సానికి కారణమయ్యారు. కరోనా మహమ్మారి పంజా విసురుతున్న వేళ సామాజిక దూరం పాటించకుండా నిర్లక్ష్యం వహిస్తే ఎంత ప్రమాదకరమో ఈ రెండు ఘటనలు వివరిస్తున్నాయి.

విజయవాడలోని కృష్ణలంక ప్రాంతానికి చెందిన ఓ లారీ డ్రైవర్ కుటుంబం కారణంగా 24 మంది కరోనా బారినపడ్డారు. కాలక్షేపం కోసం అతడు చుట్టుపక్కల వారిని పిలిచి పేకాట ఆడటమే ఇందుక్కారణం. ఇదే సమయంలో అతడి భార్య చుట్టుపక్కల ఇళ్లలోని మహిళలు, పిల్లలతో హౌసీ ఆడటం కొంపముంచింది. సదరు లారీ డ్రైవర్‌ కోల్‌కతాకు లోడ్‌ తీసుకుని వెళ్లి ఒడిశా మీదుగా ఏప్రిల్ 4న నగరానికి తిరిగొచ్చాడు. ఈ క్రమంలో కరోనా బారిన పడినట్లు భావిస్తున్నారు. ఇంటికి వచ్చిన నాటి నుంచి ఇరుగుపొరుగు వారిని పిలిచి ఇంట్లో పేకాట మొదలుపెట్టాడు.

ఇక కార్మికనగర్‌కు చెందిన మరో ట్రక్‌ డ్రైవర్‌ దుబాయ్‌ వెళ్లి అక్కడి నుంచి శ్రీలంక, చెన్నై మీదుగా విజయవాడకు వచ్చాడు. అధికారులు అతడిని హోం క్వారంటైన్‌ పాటించాలని ఆదేశించగా.. వాటిని ధిక్కరిస్తూ ఇంటి దగ్గర విందు, వినోదాలతో కాలక్షేపం మొదలుపెట్టాడు. దీంతో 14 మందికి కరోనా వైరస్ సోకింది.

Must Read:పరిస్థితి ఆశాజనకం.. ఇదే పంథా కొనసాగించాలి: కేసీఆర్

ఈ ఇద్దరు డ్రైవర్ల కారణంగా విజయవాడలో కరోనా కేసులు మరింత పెరిగే అవకాశం ఉంది. ఇప్పటికే నగరంలో కరోనా కేసులు భారీగా పెరిగాయి. కృష్ణా జిల్లాలో 127 పాజిటివ్‌ కేసులు నమోదు కాగా.. ఒక్క విజయవాడలోనే 102 కేసులు ఉండటం గమనార్హం. ఇన్ని కేసులు ఎలా వ్యాపిస్తున్నాయని అధికారులు ఆరా తీయగా.. ఈ సంచలన విషయం వెలుగులోకి వచ్చింది.

ప్రభుత్వం ఎన్ని చర్యలు తీసుకున్నా ప్రజల్లో మార్పు రాకుంటే కరోనా మహమ్మారిని నియంత్రించడం కష్టమని కృష్ణా జిల్లా కలెక్టర్‌ ఇంతియాజ్‌ హెచ్చరించారు. విజయవాడ నగరంలో ప్రజలను ఇళ్లలోంచి బయటకు రాకుండా కట్టుదిట్టమైన చర్యలు తీసుకోవాలని ఆదేశించారు.

దక్షిణ కొరియాలో ఒకే ఒక మహిళ కారణంగా సుమారు 1200 మందికి కరోనా వైరస్ సోకింది. సూర్యాపేటలోనూ ఇన్ని కేసులు కాకున్నా.. ఓ మహిళ ఇదే తరహాలో వైరస్ వ్యాప్తికి కారణమైంది. సూర్యాపేటలో కరోనా వైరస్ ఇంతలా వ్యాప్తి చెందడానికి కారణం ఏమిటని అధికారులు ప్రత్యేక దర్యాప్తు చేయగా ఈ సంచలనం వెలుగులోకి వచ్చింది. మార్కెట్‌లో ఎండు చేపలు విక్రయించే ఓ మహిళ కారణంగా కేసులు అనూహ్యంగా పెరిగినట్లు అధికారులు గుర్తించారు. ఖాళీ సమయాల్లో ఆమెకు అష్టాచెమ్మా ఆడటం, పలువురికి ఇళ్లలోకి వెళ్లి పలుకరించే అలవాటు ఉండటం కొంపముంచింది. అధికారులకు ఈ విషయం తేల్చడం అంత తేలికేం కాలేదు!

Also Read:అష్టాచెమ్మ: సూర్యాపేటలో కరోనా విలయం.. మిస్టరీ చేధించారిలా!



Source link

Leave a Reply

Your email address will not be published. Required fields are marked *