virat kohli records: విరాట్ కోహ్లీ @12.. క్రికెట్ ప్రపంచంలో రికార్డుల రారాజు – virat kohli completes 12 years in international cricket


టీమిండియా కెప్టెన్ విరాట్ కోహ్లీ అంతర్జాతీయ క్రికెట్‌లోకి అరంగేట్రం చేసి ఈరోజుకి సరిగ్గా 12 ఏళ్లయ్యింది. 2008, ఆగస్టు 18న దంబుల్లా వేదికగా శ్రీలంకతో జరిగిన వన్డే మ్యాచ్‌తో భారత్ జట్టులోకి ఎంట్రీ ఇచ్చిన విరాట్ కోహ్లీ.. ఓపెనర్ గౌతమ్ గంభీర్‌తో కలిసి ఇన్నింగ్స్ ప్రారంభించాడు. కానీ.. 22 బంతులు ఎదుర్కొన్న కోహ్లీ.. 12 పరుగులకే కులశేఖర బౌలింగ్‌లో ఎల్బీడబ్ల్యూగా ఔటైపోయాడు. అయితే.. ఆ తర్వాత బ్యాటింగ్ ఆర్డర్‌ని మూడుకి మార్చుకున్న విరాట్ కోహ్లీ.. ఇప్పుడు క్రికెట్ ప్రపంచంలోనే అగ్రశ్రేణి బ్యాట్స్‌మెన్‌గా కొనసాగుతున్నాడు.


ఈ 12 ఏళ్ల సుదీర్ఘ కెరీర్‌లో 86 టెస్టులు, 248 వన్డేలు, 81 టీ20 మ్యాచ్‌లాడిన విరాట్ కోహ్లీ.. అన్ని ఫార్మాట్లలోనూ 50.0 సగటు మెయింటైన్ చేస్తూ ఇప్పటికే 70 అంతర్జాతీయ శతకాలు నమోదు చేశాడు. ఇంటర్నేషనల్ క్రికెట్‌లో సచిన్ టెండూల్కర్ నెలకొల్పిన 100 శతకాల రికార్డ్‌ని బ్రేక్ చేయగల ఆటగాళ్ల గురించి చర్చ వచ్చినప్పుడు ఫస్ట్ వినిపిస్తున్న పేరు విరాట్ కోహ్లీ. అంతలా.. క్రికెట్ ప్రపంచంపై విరాట్ కోహ్లీ తన ముద్ర వేశాడు.

విరాట్ కోహ్లీ కెరీర్ బెస్ట్ రికార్డుల్ని ఓసారి పరిశీలిస్తే..?

1. ఐసీసీ వన్డే ర్యాంకింగ్స్‌లో 890 పాయింట్లు సాధించిన తొలి భారత క్రికెటర్ విరాట్ కోహ్లీ. 1998లో సచిన్ టెండూల్కర్ 887 పాయింట్లతో నెలకొల్పిన రికార్డ్‌ని కోహ్లీ బ్రేక్ చేశాడు.

2. సునీల్ గవాస్కర్ తర్వాత ఐసీసీ టెస్టు ర్యాంకింగ్స్‌లో 900 పాయింట్ల మార్క్‌ని అందుకున్న రెండో భారత క్రికెటర్‌ విరాట్ కోహ్లీ. గవాస్కర్ కెరీర్ బెస్ట్ 916 పాయింట్లు కాగా.. కోహ్లీ బెస్ట్ 922 పాయింట్లు కావడం విశేషం.

3. టెస్టు జట్టు కెప్టెన్‌గా అత్యధిక డబుల్ సెంచరీలు బాదిన క్రికెటర్‌గా కోహ్లీ నెం.1 స్థానంలో ఉన్నాడు. కెప్టెన్‌గా కోహ్లీ ఇప్పటికే 6 ద్విశతకాలు నమోదు చేయగా.. అతని తర్వాత స్థానంలో బ్రియాన్ లారా 5 డబుల్ సెంచరీలతో ఉన్నాడు.

4. వన్డేల్లో వేగంగా 10వేల పరుగుల మైలురాయిని అందుకున్న బ్యాట్స్‌మెన్‌ జాబితాలో కోహ్లీ‌ టాప్. సచిన్ టెండూల్కర్ 259 ఇన్నింగ్స్‌ల్లో ఈ మార్క్‌ని అందుకోగా.. కోహ్లీ కేవలం 205 ఇన్నింగ్స్‌ల్లోనే ఆ మైలురాయిని చేరుకున్నాడు.

5. రెండు జట్లపై వరుసగా మూడు సెంచరీలు బాదిన తొలి బ్యాట్స్‌మెన్ విరాట్ కోహ్లీ. వెస్టిండీస్, శ్రీలంకతో జరిగిన మ్యాచ్‌ల్లో వరుసగా మూడు శతకాల్ని కోహ్లీ బాదాడు.

6. ఒక క్యాలెండర్ ఇయర్‌లో వేగంగా 1,000 పరుగులు చేసిన బ్యాట్స్‌మెన్‌ల రికార్డ్‌లో కోహ్లీనే టాప్.

7. కెప్టెన్‌గా 2007, 2008లో ఆరేసి వన్డే సెంచరీలు బాదిన విరాట్ కోహ్లీ.. ఈ ఘనత సాధించిన తొలి కెప్టెన్‌గా వరల్డ్ రికార్డ్ నెలకొల్పాడు.

8. ఒక ఏడాది వన్డేల్లో అత్యధిక పరుగులు చేసిన బ్యాట్స్‌మెన్‌ జాబితాలోనూ కోహ్లీనే టాప్. 2017లో కోహ్లీ 1,460 పరుగులు చేయగా.. రిక్కీ పాంటింగ్ 2007 నెలకొల్పిన 1,424 రన్స్ రికార్డ్ బ్రేక్ అయ్యింది.

9. భారత్ తరఫున అత్యధిక సెంచరీలు చేసిన రెండో బ్యాట్స్‌మెన్‌ విరాట్ కోహ్లీ. ఇంటర్నేషనల్ క్రికెట్‌లో సచిన్ 100 సెంచరీలు నమోదు చేయగా.. కోహ్లీ ప్రస్తుతం 70 సెంచరీలతో ఉన్నాడు.

10. వన్డేల్లో కోహ్లీ మొత్తం 43 సెంచరీలు నమోదు చేయగా.. ఇందులో సగానికిపైగా టీమ్ ఛేదనకు దిగిన సమయంలోనే సాధించాడు.



Source link

Leave a Reply

Your email address will not be published. Required fields are marked *