west godavari accident: మద్యం తీసిన ప్రాణం.. తండ్రి చేసిన పాపానికి నాలుగేళ్ల బాలుడి మృతి – west godavari road accident: 4 year boy died due to father drunk and drive


ఆ దంపతుల మధ్య మద్యం మహమ్మారి దూరం పెంచింది. చివరకు అదే మద్యం వారి నాలుగేళ్ల పసికందును దూరం చేసి ఆ కుటుంబంలో అంతులేని విషాదాన్ని మిగిల్చింది. పశ్చిమ గోదావరి జిల్లా కుక్కునూరు మండలం చీరవల్లిలో ఓ గుండెలు పిండేసే విషాద ఘటన వెలుగులోకి వచ్చింది. గ్రామానికి చెందిన మిడియం లక్ష్మణరావుకు, వేలేరుపాడు మండలం చిన్నబుర్రాతోగుకు చెందిన భవానితో ఏడేళ్ల క్రితం వివాహమైంది.

వీరికి కుమార్తె అఖిల, కుమారుడు రోహిత్‌ కుమార్‌ (4) ఇద్దరు సంతానం. అయితే లక్ష్మణరావు మద్యానికి బానిస కావటంతో కుటుంబంలో తరచూ కలహాలు తలెత్తేవి. దీంతో భార్య భవానీ కొన్ని రోజుల క్రితం పుట్టింటికి వచ్చింది. ఈ నేపథ్యంలో లక్ష్మణరావు భార్య వద్దకు గురువారం ద్విచక్ర వాహనంపై వెళ్లాడు. అప్పటికే అతను అతిగా మద్యం తాగి ఉన్నాడు. తనకు ఇంటికి రావాలని గొడవపెట్టుకున్నాడు. అయితే తాను ఇప్పుడు రానని చెప్పడంతో సమీపంలో చిన్నారులతో ఆడుకుంటున్న నాలుగేళ్ల కుమారుడిని, భార్యకు తెలియకుండా ద్విచక్ర వాహనంపై ఎక్కించుకున్నారు. అశ్వారావుపేటలోని బంధువుల ఇంటికి బయల్దేరాడు.

అయితే వినాయకపురం సమీపంలోని మలుపు వద్ద ద్విచక్ర వాహనం అదుపుతప్పి విద్యుత్తు స్తంభాన్ని ఢీకొట్టింది. దీంతో చిన్నారి రోహిత్‌ రాయిపై పడటంతో తలకు బలమైన గాయమై అక్కడికక్కడే మృతి చెందాడు. తీవ్ర గాయాలైన లక్ష్మణరావు అపస్మారక స్థితిలోకి వెళ్లాడు. దీంతో వీరిని అంబులెన్స్‌లో అశ్వారావుపేట సామాజిక ఆస్పత్రికి తరలించారు. ఈ విషయం తెలుసుకున్న బాలుడి తల్లి భవాని హుటాహుటిన ఆసుపత్రి వద్దకు చేరుకొంది. పోస్టుమార్టం గదిలో కుమారుడి మృతదేహాన్ని చూసి గుండెలవిసేలా రోదించింది. భవాని ఫిర్యాదు మేరకు కేసు నమోదు చేసి విచారిస్తున్నట్లు ఎస్సై మధుప్రసాద్‌ తెలిపారు.



Source link

Leave a Reply

Your email address will not be published. Required fields are marked *