West Indies cricket team: కరోనా ఎఫెక్ట్.. వెస్టిండీస్ క్రికెటర్ల జీతాల్లో 50 శాతం కోత – covid-19: cricket west indies announces pay cut for players, employees


కరోనా వైరస్ కారణంగా క్రికెట్ సిరీస్‌లన్నీ రద్దవడంతో రూ. వందల కోట్లు నష్టపోయిన వెస్టిండీస్ క్రికెట్ బోర్డు.. ఇప్పుడు కనీసం ఆటగాళ్లకి పూర్తి స్థాయిలో జీతాలు కూడా ఇవ్వలేకపోతోంది. జులై నుంచి క్రికెటర్లతో పాటు సహాయ సిబ్బందికి కూడా 50 శాతం జీతాన్ని మాత్రమే చెల్లిస్తామని తాజాగా ప్రకటించిన విండీస్ క్రికెట్ బోర్డు.. ఈ క్లిష్ట పరిస్థితుల్లో అందరూ సహకరించాలని కోరింది. జులైలో ఇంగ్లాండ్ పర్యటనకి వెళ్లనున్న వెస్టిండీస్ జట్టు.. అక్కడ మూడు టెస్టుల సిరీస్‌ని ఆడనుంది.

వాస్తవానికి గత ఐదారేళ్లుగా వెస్టిండీస్ క్రికెట్ బోర్డు నష్టాల్లో నడుస్తోంది. ఈ ఏడాది జనవరిలో ఐర్లాండ్‌తో సిరీస్‌ ఆడిన వెస్టిండీస్ టీమ్.. ఆ తర్వాత ఫిబ్రవరి -మార్చిలో శ్రీలంకతో మ్యాచ్‌లు ఆడింది. కానీ.. ఈ రెండు సిరీస్‌లకి సంబంధించి ఆటగాళ్లకి మ్యాచ్ ఫీజుల్ని ఆలస్యంగా చెల్లించింది. అలానే ఆస్ట్రేలియా వేదికగా ఇటీవల ముగిసిన ఉమెన్స్ టీ20 వరల్డ్‌కప్‌లో వెస్టిండీస్ మహిళా జట్టు నాలుగు మ్యాచ్‌లు ఆడింది. ఆ టోర్నీకి సంబంధించి మ్యాచ్ ఫీజులు కూడా చెల్లించడంలోనూ జాప్యమే. తాజాగా ఆ చెల్లింపులని పూర్తి చేసిన విండీస్ బోర్డు.. కనీసం 3 నుంచి 6 నెలల పాటు సగం జీతానికి మానసికంగా సిద్ధమవ్వాలని సూచించింది.

వెస్టిండీస్ క్రికెట్ బోర్డు, ఆటగాళ్ల మధ్య ఈ మ్యాచ్ ఫీజుల విషయంలో గతంలోనే పెద్ద ఎత్తున వివాదాలు నడిచాయి. క్రిస్‌గేల్, ఆండ్రీ రసెల్, డ్వేన్ బ్రావో, సునీల్ నరైన్, డ్వేన్ స్మిత్ తదితర సీనియర్ క్రికెటర్లు బోర్డుతో విభేదాల కారణంగా చాలా రోజుల పాటు అంతర్జాతీయ క్రికెట్‌కి దూరమయ్యారు. ఇప్పటికీ చాలా మంది వెస్టిండీస్ క్రికెటర్లు ఆ దేశం తరఫున ఆడటం కంటే ఐపీఎల్ లాంటి ప్రైవేట్ టీ20 లీగ్‌లు ఆడటానికే అధిక ప్రాధాన్యమిస్తుంటారు.



Source link

Leave a Reply

Your email address will not be published. Required fields are marked *