Yanamala Ramakrishnudu: రాష్ట్ర చరిత్రలోనే తొలిసారి ఏజీ ప్రెస్‌మీట్, ఇది కోర్టు ధిక్కారమే: టీడీపీ – tdp senior leader yanamala ramakrishnudu condemns over ag sriram press meet


రాష్ట్ర ఎన్నికల కమిషనర్‌ (ఎస్ఈసీ)గా నిమ్మగడ్డ రమేష్ కుమార్ తిరిగి బాధ్యతలు చేపట్టడంపై ఏపీ అడ్వకేట్ జనరల్ సుబ్రహ్మణ్యం శ్రీరామ్ శనివారం రాత్రి ఆయన ప్రెస్‌మీట్ పెట్టడంపై తెలుగు దేశం పార్టీ తీవ్ర విమర్శలు చేసింది. ఏజీ శ్రీరామ్ ప్రెస్ మీట్ పెట్టడంపై శాసనమండలిలో ప్రతిపక్ష నేత యనమల రామకృష్ణుడు అభ్యంతరం వ్యక్తం చేశారు. ప్రభుత్వ న్యాయ నిపుణుడు (ఏజీ) హైకోర్టు తీర్పుపై ప్రెస్‌మీట్ పెట్టడం రాష్ట్ర చరిత్రలో ఇదే తొలిసారని వెల్లడించారు. న్యాయవాదిగా, రాజకీయ నేతగా ఇలాంటి పరిస్థితి నేనెప్పుడూ చూడలేదన్నారు. హైకోర్టు తీర్పు ఇచ్చాక దాన్ని వివరిస్తూ అడ్వకేట్ జనరల్ ప్రెస్ ముందుకు వచ్చిన దాఖలాలు గతంలో లేవన్నారు.

తీర్పుపై అప్పీల్ చేసుకునే అధికారం ప్రభుత్వానికి ఉందని, అందులో వాళ్ల వాదన వినిపించవచ్చని యనమల పేర్కొన్నారు. కానీ, దానికి భిన్నంగా ఏజీ మీడియాను అడ్రస్ చేసిన సందర్భం గతంలో లేదన్నారు. సీఎంవో కార్యదర్శి ప్రవీణ్ ప్రకాష్‌ను, పంచాయితీరాజ్ కార్యదర్శి గోపాలకృష్ణ ద్వివేదిని చెరోవైపు పెట్టుకుని ఏజీ ప్రెస్ మీట్ పెట్టడం అభ్యంతరకరమన్నారు. ప్రభుత్వ దురుద్దేశాలను ఏజీ ద్వారా చెప్పించాలనే తాపత్రయం దీని ద్వారా వెల్లడైందన్నారు.

Must Read: నిమ్మగడ్డ రమేష్ కేసులో ట్విస్ట్, ఆయనకు ఆ అధికారమే లేదు.. తొలిసారి ఏజీ ప్రెస్‌మీట్!

ఏజీ ప్రెస్ మీట్ పెట్టడం మరో దుస్సంప్రదాయమని యనమల వ్యాఖ్యానించారు. హైకోర్టు తీర్పులో పేర్కొన్న ‘‘స్టాండ్ రెస్టోర్డ్’’ అనే పదాన్ని ప్రస్తావిస్తూనే, దానికి ఏజీ వక్రభాష్యాలు చెప్పడం దారుణమన్నారు. ‘‘స్టాండ్ రీస్టోర్డ్’’ అంటే ‘‘ఆటోమేటిక్ రెస్టోరేషన్’’ అని.. ఇవన్నీ అటార్నీ జనరల్ గారికి తెలియనివి కావని, అయినా మీడియా ముందు వక్రీకరణలు భావ్యం కాదన్నారు. ఎస్ఈసీకి సహకరించవద్దని ప్రభుత్వం ఎలా చెబుతుందని ప్రశ్నించారు. హైకోర్టు తీర్పును వక్రీకరిస్తూ ప్రెస్ మీట్ ఎలా పెడతారు..? ఇది కోర్టు ధిక్కరణ కాదా? అని ప్రశ్నించారు. ఇప్పటికే కోర్టు ధిక్కరణ కేసులో కోర్టుకు హాజరైన అధికారిని పక్కన పెట్టుకుని ఏజీ మళ్లీ కోర్టు ధిక్కరణకు పాల్పడతారా? అని ప్రశ్నించారు. న్యాయనిపుణులు మీడియా ముందుకు రారు అంటూనే ప్రెస్ మీట్ పెట్టడం రాజకీయ ప్రేరేపితమేనని వ్యాఖ్యానించారు.



Source link

Leave a Reply

Your email address will not be published. Required fields are marked *