YS Jagan: మా అమ్మ కావాలి సర్.. కంటతడి పెట్టించిన విద్యార్థిని.. చలించిపోయిన సీఎం జగన్ – cm jagan emotional over tenth class student ramya speech in mana palana mee suchana meeting


రాష్ట్రంలో వైఎస్సార్‌సీపీ ప్రభుత్వం అధికారంలోకి వచ్చి ఏడాది పూర్తయిన సందర్భంగా మన పాలన- మీ సూచన కార్యక్రమంలో భాగంగా బుధవారం తాడేపల్లిలోని క్యాంపు ఆఫీస్‌లో ముఖ్యమంత్రి వైఎస్ జగన్మోహన్‌రెడ్డి విద్యా రంగంపై సమీక్ష నిర్వహించారు. ఈ సందర్భంగా పాఠశాలల్లో నాడు- నేడు, ఇంగ్లిష్‌ మీడియం విద్య, అమ్మ ఒడి, జగనన్న విద్యాకానుక, వసతి దీవెన, ఫీజు రీయింబర్స్‌మెంట్‌పై చర్చించారు. ఇందులో భాగంగా విజయవాడకు చెందిన రమ్య అనే 10వ తరగతి విద్యార్థిని మాట్లాడిన మాటలు ముఖ్యమంత్రి వైఎస్‌ జగన్ను కదిలించాయి.

కృష్ణా జిల్లా కానూరు ప్రభుత్వ పాఠశాలలో 10వ తరగతి చదువుతున్న యు.రమ్య అనే విద్యార్థిని సీఎం జగన్ను మామయ్య అని సంబోధిస్తూ తనకు అందుతున్న పథకాలకు సంబంధించిన విషయాలను వివరించింది. తన తల్లికి ఆరోగ్యం బాలేదన్న విషయాన్ని ముఖ్యమంత్రి దృష్టికి తీసుకొచ్చింది. ‘‘నాకు మా నాన్న లేరు సర్‌.. మా అమ్మ నన్ను కూలీ పని చేస్తూ చదివిస్తోంది. నేను సీఐడీ ఆఫీసర్‌ కావాలనే లక్ష్యం ఉండేది. కానీ పేదవాళ్లం కావడంతో అది నెరవేరుతుందనే నమ్మకం లేదు. కానీ మీరు నాకు మామయ్యలాగా అండగా ఉంటూ నా చదువుకు భరోసా కల్పించారు. ‘అమ్మ ఒడి’ పథకం ద్వారా లబ్ధి పొందాను. దీంతో నేను లక్ష్యాన్ని చేరుకుంటాననే నమ్మకం వచ్చింది సర్‌. మీలాంటి వ్యక్తి మాకు ముఖ్యమంత్రిగా రావడం నిజంగా మా అదృష్టం. వీ ఆర్‌ లక్కీ అండర్‌ యువర్‌ రూల్‌ సర్‌.

ఒక మామయ్యగా మీకో విషయం చెప్పాలనుకుంటున్నా సర్‌. చెప్ప వచ్చో, చెప్పకూడదో నాకు తెలియదు, కానీ చెబుతున్నా సర్. నా తల్లి ఆరోగ్య పరిస్థితి అస్సలు బాగోలేదు. ఆమె ఎప్పుడు చనిపోతుందో కూడా నాకు తెలియదు. ఒక వారం ఉంటుందో.. నెల ఉంటుందో తెలియదు కానీ.. నాకు మా అమ్మ కావాలి సర్‌. ఎలాగైనా ఆమెను బతికించండి సర్‌’’ అంటూ కన్నీటి పర్యంతమైంది.

రమ్య మాటలకు చలించిపోయిన సీఎం జగన్‌ వెంటనే సంబంధిత అధికారులతో మాట్లాడి రమ్య తల్లిని ఆసుపత్రికి తరలించాలని సూచించారు. సీఎం ఆదేశాలతో తక్షణమే స్పందించిన హెల్త్‌ ఆఫీసర్‌ వైద్య సిబ్బందితో రమ్య ఇంటికి చేరుకొని ఆమె తల్లిని ఆస్పత్రికి తరలించారు. తన తల్లిని ఆస్పత్రికి తరలించడంతో సీఎం జగన్‌కు రమ్య కృతజ్ఞతలు తెలిపింది.



Source link

Leave a Reply

Your email address will not be published. Required fields are marked *